Rä

El Rä, ud el Ra (rulägüptänapükiko "Rīʕu", "el meköl"), äbinom God Sola in miteodav rulägüptänik. Äbinom ülgod e rig vala. Äbinom Nenfinamalord, jafal de Sil e de Tal, balidan, ek pämotom, balan, ek ijafom oki. Ävädom cifgod du Rureigän (2647 - 2150). Ebumo du reig lulid (2465 - 2492), ävädom god netik, e päyümom ko el Amon, nemü vädön el Amon-Rä, cifgod Rulägüptäna. Äbefoom motedanomi rega e päpenom in faraonadispenäd. Äbinom reg godas e menas.

Mags

Pämagom valemo fa falok, fa men falokakapik, ud ömna fa hijip. Älenlabom su kap diskoti sola ed Uraeus (sneik regik). Täno el Rä öyümätom ko el Atum ed el Amon, nemü vädön el Atum-Rä ed el Amon-Rä.

Moted ela Rä

Bai konäd, el Rä pämotom fa Neith in dag, kel äbinon bifü lif su Tal. Ämotof id sneke ele Apofis. Bai konäd votik, sagoy, das el Rä ejafom oki in lotüsaflor, panemöl "ülik". Täno ejafom eli Ju ed eli Tefnut.

Kultazif cifik dö el Rä

El Rä päleplekom balido in el Heliopolis ("Solazif"), täno kult oma ästäänikon al län lölik. Ätikoy, das ätävom delo da sil me "smalbot godik" ed äkomipom ta el Apofis.

Dadeidät menäta

Büfo Lägüptän päguveron fa reg menik, reg onik äbinom el Rä. Bäldikölo boms omik älargentakölikoms e kop omik ägoldinakölikon. El Rä äkanom lilön menis mepükön ta om. Kludo del sembal, äsludom ad ät: ösedom logi omik su Tal fomü jileonagod. At öpugof su Tal. El Rä ägevokom vifiküno ofi, ad el Sehmet, jileonagod, äfilabof bludaguti: äsludof so gegolön su Tal. El Rä ämutom tüvon modi nemü cüdön eli Sehmet: äbüdom preparön hodabiri. Bir pämigon ko redaköl ed ämekoms ninädianis velmil drinoda lalkoholik, kel älogoton blude. El Rä äbüdom vagükön ninädianis su pöps, kelis jigod ävilof moükön. Ägolof uti, keli ätikof binön blud, ed änexänof nemü drenön eti. Ädrenof so ka äbrietikof.