Apofis

El Apofis, ud el Apopis (rugrikänapükiko "Άπόφις", ud "Άπώφις", ed rulägüptänapükiko "Apep", "Apepi", "Aapep", ud "Aapef"), äbinom god miteodava rulägüptänika, malat bada, neita, kaota, e daga. Pämagom valemo fa snek gianagretik. Nem rulägüptänapükik omik, "ʕʒpp", cedon "gianagretik" u "snek gianagretik". Äbinom neflen cifik goda ela Rä. Du tumyel telid bü Y.K., konäd de moted ela Apofis pakonon su völs tema ela Esneh. Lärnoy dö etos, das el Neith, jigod yagöl, ämotof ele Apofise spukölo in ülvats.

Mags

Pämagom valemo fa snek gianagretik lenatik, e semiknaiko fa tortug, suvo pasumätüköl, paflapöl, u padeidöl, nemü magön levikodi guda. Bal bevü mags kösömiküns binon ut, keli kanoy tuvön in Buk Deadamas. Kat ela Rä, malat jigoda ela Bastet, i panemöl kati ela Heliopolis, leviodof e deidof sneki dub neif. Tuvoy ömna magis ela Apofis patanöl e padudadranöl fa sagits.

Lekomips ta el Rä

Bai nols dö god at, el Apofis ätatakom delo boti ela Rä, kel äsailon su el Nun (ülsean) du täv okik da el Duat (val disglunik), adas äfinidom jafädaprogedi, ab ai pävikodom. Nemü gejoikön eli Apofis, el Rä päyufom fa gods votiks: el Sethesh päcälom fa el Rä nemü jelodön boti godiki dub lesagit. Tö botaflom el Isis äfrutof nämädis okik, nemü sädütön omi sienes, dat änelefüdof omi; atos äleadon kate kapadäkötön sneki. Kludo solasülöpikam alik äcedon vikodi ela Rä ta el Apofis. Blud, kel äflumon de vuns omiks, äredükon gödasili. Tikoy, das Rulägüptänans äkleilükoms solagrahanis, äs nevikodis ela Rä.

Kult e relageböfs dö el Apofis

Bi el Apofis ämagom badi, ädabinon kult calöfik nonik dö om. Mageds natiks, äs teps e talaledremets, päkosädoms ko el Apofis. Ämagom tädi laidiki ta lespadalaid, so Rulägüptänans äseifüloms sofälükön omi dub blasfäms magivik. Buk ela Apofis, su papürod ela Rhind-Bremer, de timäd Reigän Nulik, memon blasfämi patiki, nemü yufön Godi Sola tadunön tatakes ela Apofis. Kleräts äbepenoms dunotis progedöfik de vität e de moükät: spukön al el Apep; miotön eli Apep dub fut nedetik; sumön lesagiti nemü flapön elApep; tanön eli Apep; sumön neifi nemü flapön eli Apep; filükön eli Apep. E ko komands ets ädabinons lejonods in geidian et nemü mekön, väko u däsinoto, snekis gianagretik, kels püfiloms u püsumätükoms, u su kels üspukoy, du ükomoreidoy blasfämis. Rulägüptänans ädredoms, das igo magod ela Apofis kanonöv givön nämädi diabile. Bi el Apofis älödom in val disglunik, pävätälom ömna, äs "lanifidöl".