Willem Drees
| |
|---|---|
| Moted: | 5 yulul 1886 Amsterdam |
| Deadam: | 14 mayul 1988 's-Gravenhage |
| Lifatopam: | Amsterdam, 2e Schuytstraat[*], Van Bleiswijkstraat[*], Marnixkade[*], Haarlemmerplein[*], Marnixkade[*] |
| Cal(s): | hibolitan[*], resistance fighter[*], italifajenädan[*], bank teller[*], stenographer[*] |
| Tatät(s): | Regän Nedäna[*] |
| Matan(s): | Catharina Drees-Hent[*] |
| Cil(s): | Willem Drees jr.[*] |
| Dispenäd: | |
| |
Hiel ‘Dr. Willem Drees’ (pämotöl tü 1886, yulul, d. 5id tö ‘Amsterdam’, ädeadöl tü 1988, mayul, d. 14id tö ‘Den Haag’) äbinom bolitan Nedänik, fa öman palecedöl as balan bolitanas veütikün in Nedän pos Volakrig telid. Dü yels: 1948–1958 äbinom ministeran⸗presidan Nedäna ä poso tataministeran. El ‘Drees’, sevädöl as man neflagiälik labü lifastül vemo balugik, äjuitom pöpedi lovexänöl miedis paletabolitik ä pänäinemom „fatül: ‘Drees’”.
El ‘Drees’ äbinom sogädademokratiman pesüadüköl, ab i pragmatiälan, kel suvo ösagom: „No valikos mögon, e pato no mögon leigüpo.”[1] Ün 1904 älüyumom lü Vobanefapalet Sogädademokratimik (‘SDAP’), övotafomöl ini Vobapalet (‘PvdA’) ün 1946. De 1906 jü 1919 ävobom as stenografan pro komotakonsäl zifa: ‘Amsterdam’ ä poso pro dail Nedänik. Plä at äbinom i presidan diläda ela ‘SDAP’ in ‘Den Haag”. Pos karier in bolit komitik as komotakonsälal e komotacifodan[2] in zifa at ävedom depütab in donadail Nedänik: el ‘Tweede Kamer’ ün 1933.
Pos Volakrig telid el ‘Drees’ päcälom ministerani dinädas sogädik, dü calam kelik ävedükom stabi pro sit lätikum pänsionisuras sogädik medü el „ditretadisin” sonemik de yel: 1947. Tü 1948, gustula d. 7id ,Drees’ ävedom ministeran⸗presidan. Jü 1958, dekula 22id ädugom reiganefis fol balposvotikis. Dü degyel vüik äjäfikom me bejäfabots veütik, äsä bekomip sekas mifätik koupa Deutänik, dönubum könomik Nedäna, säkolun Lofüda⸗Lindäna Nedänik, lebum cifodastütedasita äsi kobovob bevünetik, keninükamü dafom ela ‘Benelux’[3], ela ‘Noganükam pro kobovob e völf könomik’, ela ‘NBNL’ ed ela ‘Kobäd könomik Yuropik’. Pos calam oma as ministeran⸗presidan ‘Drees’ ävedom tataministeran.[4]
Ün degyel velid ‘Drees’, nekotenik dö lüod nedetik paleta oka, älüvom eli ‘PvdA’, ye no älüyumölom lü palet sogädademokratik nulik: ‘DS'70’, dugan kelik äbinom son okik: ‘Willem Drees jr.’. Ädeadom ün 1988 bäldotü lifayels 101.
El ‘Drees’ äbinom noe bolitan, abi plägan speranta. Ün 1954 älüspikom Kongredi valemik speranta, kel in yel et päjenükon in ‘Haarlem’.
Noets
redakön- ↑ Hans Daalder, Het socialisme van Willem Drees (2000). Pad: 40.
- ↑ Ned. ‘wethouder’: liman cifanefa komota Nedänik, zao äs ministeran su nivod netik.
- ↑ ‘Benelux’: balatam finedik ä könomik Nedäna, Belgäna e Luksämburgäna, ün 1948 pestaböl.
- ↑ In Nedän tataministeran binon stimaministeran seimasotik: cal palabülöl fa bolitans lelogädikün ä plakilabikün.