Vög Volapüka
Vög Volapüka binon gased Volapükik teik nog papüböl (pefünon fa hiel Ralph Midgley: guvan Volapükanefa).
Hiel Ralph Midgley (Greta-Britän) äpreparom segivotis balid gaseda okik finü yel: 1989, ab nomöfiko, efe almuliko, äpubon te sis yel: 1990 (yelod balid). Dü yel bal püba tiäd gaseda äbinon: “Pened Komunik Volapükaflenes Valöpo”. Reidans anik älecedons tiädi somik nejöniki, kludo ün yel: 1991 pivotükon ad “Flenef Bevünetik Volapüka” (ko donatiäd: “Sirkülapenäd ad Volapükanef”, latikumo: “Sirkülapenäd lü Volapükaflens valöpo”) ma nem kluba, kel i pifünon fa ‘Ralph Midgley’. Ün yel: 2004 redakan it telidnaedo äfeablunedom gasedi, efe atna ad “Vög Volapüka” (nem at jünu pagebon).
‘Ralph Midgley’ äredakom gasedi almulik at jüesa novul yela: 2014, kü hiel Hermann Philipps: cifal (Deutän) < ävedom redakan nulik. Dü redakam oma boso pävotükon donatiäd ela “Vög Volapüka” (“Sirkülapenäd Volapükaflenes valöpo”, “Sirkülapenäd Volapükanes valöpo”). Sis prilul ela 2020 redakan binom el Daniil Morozov: vicifal (Rusän).
Lautans e/u tradutans laidiks periodas difik binons: ‘Brian Bishop’, ‘Jean-Claude Caraco’, ‘Sérgio Meira’, ‘Ralph Midgley’, ‘Daniil Morozov’, ‘Ian Niles’, ‘Hermann Philipps’, ‘Robert Pontnau’, ‘John Redgwell’, ‘Arden R. Smith’, ‘Oleg Temerov’, ‘Emmanuel Wald’, ‘Igor Wasilewski’, ‘Danny Zhang’ (ü ‘Zhang Yutong’). I suvo panotükons dönuamo vobots fa mastans famik Volapüka. Bevü votikos medü gased at i sluds kadäma Volapüka e dalebüds cifala panotükons. Sotül leäktronik ela “Vög Volapüka” nu primo pubon pö Volapükagrup di ‚Facebook’.
Ragivs bevüresodik ko nüms ela “Vög Volapüka”
redakönPad gaseda jü yel: 2004 pö bevüresodatop ela Oleg Temerov
Pad gaseda sis yel: 2004 pö bevüresodatop ela Oleg Temerov