Konletateor

Konletateor binon teorod matematik konletas, kels magons grupis yegas nedabinotik. Keninükon suemodis balugik aldelik penüdugöl in stabajul: grups yegas, binets grupas at ed i dutöf lü grups at. Ma fomims matematik atimik mödikum, konletateor labükon püki, in kel yegs matematik pabepenons. Binon (kobü tikav e predikatakalkulav) bal stabas xiomik matemata , dälölo yeges matematik ad pabumön kuratiko de binets nenmiedetik: „konlet“ e „dutöf lü konlet“. Binon ito donajäfüd matemata ed i ziläk jenotagik vestiga matematik.

Ma konletateor balugälik, konlets panüdugons e pasuemons medü suemod - as klülik palelogöl - konletas as yegagrups palelogöl as löls.

In konletateor xiomik, suemods: „konlet“ e „dutöf lü konlet“ pamiedetons nestadöfiko, medü xioms primik semik, kels lisedons e bepenons patöfis onsik. Ma suemam at, konlets e dutöf lü konlets binons suemods staböfik äs püns e liens in geomet ela Eukleides, o. b. no pamiedetons stabü binets votik.

Logolös i

Hiel Georg Cantor (1845-1918) - matematan e filosopan Deutänik, sevädik as datikan konletateora.
Hiel Giuseppe Peano (1858-1932) - matematan e filosopan Litaliyänik, datikan malülas balama e vüköteda konletas, ä xiomükan kalkulava.
Lised yegädas konletateora
Yeged at dö konlets binon nüdugot staböfik konletateora balugik.
Konletateor balugälik binon konletateor rigik, fa matematanas finü tumyel 19id pävölföl.
Konletateor xiomik binon donajäfüd xiomik kuratik matemata, kel pävölfon gesagü tüv säkädas fefik pö binod konletateora balugälik (soäs letaöf hiela Russell).
Konletateor hiela Zermelo binon xiomasit pevölföl fa matematan Deutänik Ernst Zermelo.
Konletateor hielas Zermelo e Fraenkel binon xiomasit konletateorik suvüno pageböl, stabü konletateor hiela Zermelo sa läükots hielas Abraham Fraenkel e Thoralf Skolem.
Konletateor hielas von Neumann, Bernays e Gödel binon xiomasit konletateorik pedesinöl ad sümön ad ut elas Zermelo e Fraenkel, labü i välaxiom, ab i labü num no nenfinik xiomas (o. b. nen xiomaskemats).
Stabs Nulik e konletateor siädik binons ans konletateoras no vönaoloveikas, kels pemobons jünu.
Konletateor ninik binon stäänükam konletateora xiomik, kel dasumon bids no vönaoloveiks numas, äs smalikünots.
Fomams distik tikava labons i konletabidis patedik (a. s. konlets nekuratik pö tikav nekuratik).
Konletateor musigik bejäfon gebi diletama yümätik e grupateora pö musig; ab, pläamä gebon konletis finilabik, no labon tefis ko konletateor matematik seimik. Dü degyels lätik tel, musigator ceinöl egebon kuratikumo suemodis konletateora matematik (l. Levin 1987).