Drachten

Drachten binon vilag cifik komota: Smallingerland in provin Nedänik: Frisän. Labon belödanis za 44 800, e dabinons vobaplads za 22 000.

Drachten

Sköt ela ,Drachten’

Topam

Län:

Nedän

Provin:

Frisän

Komot:

Smallingerland

Koordinats:

53°6'N, 6°6'E

Nüns cifik

Timatopäd:

UTC+01:00[*]

Potakot:

9200–9207

Ragivs tefü el ,Drachten’ in Kobädikos

Jenotem

Drachten ädavedon ün tumyel 17id dub balam vilagilas: Noorder Drachten e Zuider Drachten, len flumedil: Drait ü Dracht. Topäd at äbinon liegik mö glunot; ad moveigön turbi de on pädagetöli ädavedon el Drachtster Compagnonsvaart. Poso ädavedons us i nafibumöps.

Do binon gretik (ma züot binon top pabelodöl balid provina: Frisän), el Drachten no duton lü „zifs degbal di Frisän“. Drachten neai ägeton zifagitätis, klu binon jenöfiko vilag, do sekü gretot, dustod topik e düns notidik suvo panemon zif.

Primü degyel 1950 vilag älabon belödanis za degmils. Ün 1950 päbumon us fabrik ela Philips; pos atos belödanef äpluikon vifiko.

Veig

Drachten topon len leveg A7 vü Heerenveen e Groningen, e len N31 lüodü Leeuwarden. Binon vilag gretikün Nedäna, kel no peyümon ko votiks dub trenaveig (pläamü trens lü dustodatopäds, trämavegs e distrenavegs). Dinäds at bo ovotikons dub bum trenavega: Zuiderzeelijn, vü Schiphol e Groningen. Drachten labon lutapofili: Vliegveld Drachten, kel büo äleduton lü Philips.

Dustod

Sis 1950 dabinon in Drachten fabrik kompenäta cinaleäktronik Nedänik: Philips, kö jeifians famik: Philishave pamekons. Fabrik äprimon ün 1950 labü vobans 14. Atimo vobons us mens telmil.

In Drachten topon i dustodatopäd gretikün Nolüda-Nedäna: Industrieterrein de Haven. Votaflanü Drachten, ve leveg: A7, pabumon dustodatopäd: A7. Dil balid päfinükon ün 2006; anu (ün 2007) voboy pö dil telid.

Kuliv e livüpadun

Drachten labon teatöpi gretik ä nulädiki bali: de Lawei, ed i yunanaklubi: Iduna. Mused Smallingerland, in kleud bäldik topölo, jonon vobotis lekananas frisidik soäs Piet Pander e Sjoerd de Roos, Theo van Doesburg, blodef: Evert e Thijs Rinsema, e „dada“-lekanan Kurt Schwitters. Dabinon nog dil smalik ela Drachten, kel pädisinon ün 1921 fa el van Doesburg. Sekü köls fa om päbüdülöls, zifadil at panemon Papegaaienbuurt (Papaganiläd).

Drachten labon i svimaparadi vütropik, me mätedasvimöp lunotü mets 50, ed i spotöpis distöfik mödik votik. Drachten kompenon pö els skûtsjesilen (mäted sailabotas frisidik) me skûtjes (sailabots) twee: d'Halve Maen e Drachten.

Mens famik se Drachten

Binne Billeman van der Veen (1818 mäzul 24 - 1892): lautan.
Ietje Kooistra (1861 yanul 8 - 1923 gustul 25 tö Appeldoorn): dugälan ä dilekan ela Rijkskweekschool voor Onderwijzeressen.
Pier Pander (1864 yunul 20 - 1919 setul 6 tö Roma): skulturan.
Thijs Rinsema (1877 yunul 18 - 1947 mäzul 1 tö Smallingerland): lekanan e jukel.
Evert Rinsema: lekanan e jukel, blod ela Thijs Rinsema.
S. H. de Roos (1877 setul 14 - 1962 prilul 3 tö Haarlem): bukavan e lekanan.
Fedde Schurer (1898 yulul 25 = 1968 mäzul 19 tö Heerenveen): poedan frisidik.
Sieuwert Bruins Slot (1906 yanul 8 - 1972 prilul 4 tö Haarlem): bolitan Nedänik (ARP) e cifaredakan delagaseda: de Trouw.
Gerben Sonderman (1908 - 1955 tobul 20, in Tats-Pebalöl): flitömistirädan famik ela Fokker, stirädan pösodik plina: Bernhard.
Sjoerd Leiker (1914 mayul 28 - 1988 dekul 15 tö Hoorn): lautan.
Ellen de Thouars (1915 prilul 11 - 1997 yulul 14 tö Amsterdam): dramatan.
Jan Frearks van der Bij (1922 novul 4): lekanan.
Harry Kuitert (1924 novul 11): godavan Nedänik.
Klaas Ozn. de Jong (1926 febul 27), tatasekretan pro tid e nolavs (1978-1981).
R. R. van der Leest (1933 yunul 29), lautan.
Auke Herrema (1956 dekul 16): däsinan.
Gerrit Hiemstra (1961 gustul 19): stoman pö el NOS-Journaal televidik.
Laura Vlasblom (1968 tobul 8): kanitan (Kinderen voor Kinderen, Frizzle Sizzle e r.).
Arjan Hut (1976): poedan topik.
Wim Stroetinga (1985 mayul 23): saikulan.

Yüms plödik

Commons: Drachten – Kobädikos labon ragivis/magodis tefü