Dinits Volapükamufa

Volapükamuf äbinädon primo te me nitedälans: Volapükaflens (‘Schleyer’ änemom so i yufanis valik, samo stütedanis, kels me mon okas ämögükons büki Volapükaliterata). Suno ye (ba dub flun dinitaleoda glüga romakatulik) äpubons dinits difik... Jenav onsik kanon pasökön se pads gaseda ela Schleyer: Volapükabled zenodik.

• Poso cifal balid: Albert Sleumer ävotükom dinitanemis valik ma noms Volapüka perevidöl.

Dadiläd dinitas Volapükik ma ‘Sleumer’

Ün 1934 hiel Sleumer äleodükom dinitis valik tima di ‘Schleyer’ ön mod sököl (donikumo leigodü lised omik grups tel pebalons, sevabo: 1-ido) els “Cals e dinits klubis teföls” e “Dinits guverik”, e 2-ido) els “Dinits kadämik” e “Dinits nolavik no kadämiks”). Datuval it ün 1890 ämobom ad distidön sotis sümik dinitas, sevabo: 1-ido) nolavikis, 2-ido) guverikis (keninükamü cifam klubas), 3-ido) difikis. Jü yel 1906id dinits 42 (bi dinit donikün, efe julan, älabon nümi sökaleodik tefik) ya ädabinons (keninükamü labans köna di ‘Schleyer’), ab ‘Schleyer’ neföro ägevom lisedi lölöfik titulas valik, e num at jinon binön dotabik.

Cals e dinits guveriks

Nüm	Ma ‘Schleyer’	Ma ‘Sleumer’	Nem mögik votik	Dät geva balid	Küpets
1	klubadünan	klubadünan	–	no pägevon
2	kopanal (kluba sembal)	liman kluba	–	1891, 12ul
3	kluban klubuma konstanzik	liman kluba veitätik di ‘Konstanz’	kluban foginik di ‘Konstanz’	1890, 6ul	sotüls difik titula ma ‘Schleyer’: kopanal kluba konstanzik, kluban klubuma konstanzik, kopanal klubuma (veitikum) konstanzik, kopanal klubuma valemik konstanzik, kopanal kluba valemik konstanzika
4	kluban konstanzik kluba nabikum	liman di ‘Konstanz’ kluba topik	kluban voik di ‘Konstanz’	1890, 9ul
5	cifakopanal	liman cifefa ü cifefan	–	1891, 6ul	u: cifekopanal, cifefakopanal
6	läsiedan cifa	presidaniyufan	–	1891, 3ul
7	kädan	kädan	–	1890, 4ul
8	bukal (bukikonletel)	bukeman	–	1890, 4ul	i bukikonledel
9	penädan	sekretan	–	1890, 4ul
10	sekretan cifa	sekretan cifa	–	1890, 4ul	ma ‘Schleyer’: sekretan, poso sekredan
11	blacif	vipresidan	vicif, Volapükavicif	1890, 4ul
12	cif	presidan (kluba)	Volapükacif, cif (kluba)	1882, 8ul
13	cif stükafetanoga	presidan feda ziläkaklubas	–	1890, 11ul
14	blacifel	vipresidan klubas valik läna u reigäna	länavicif, läna-Volapükavicif	1890, 8ul
15	cifel	presidan klubas valik läna u reigäna	länacif, läna-Volapükacif	1887, 12ul	poso: cifan (ma ‘Schleyer’)
16	lecif	presidan klubas valik reigäna gretik	reigänacif, reigäna-Volapükacif	1890, 2ul
17	lecifel	presidan klubas valik taledadila	kontinänacif, kontinäna-Volapükacif	no pägevon

Dinits nolavik

Nüm	Ma ‘Schleyer’	Ma ‘Sleumer’	Nem mögik votik	Dät geva balid	Küpets
18	julan	–	–	1891, 5ul
19	tidel	tidan Volapüka ü Volapükitidan	–	1881, 1ul
20	löpitidel	tidal Volapüka ü Volapükitidal	–	1887, 1ul
21	plofed	profäsoran Volapüka	–	1887, 6ul
22	xamel	xaman	–	1887, 12ul
23	kademan	kadäman	–	1889, 2ul	primo: kademel
24	kademal	kadämal	–	1887, 8ul
25	bladilekal kadema	vidilekan kadäma	–	1890, 12ul
26	senätan	senätan	–	1889, 2ul
27	ocifal ä dilekel kadema	fovan fütürik cifala ä dilekana kadäma	fovan datuvala ä cifal fütürik; vicifal	1894, 8ul
28	cifal Vpanefa	no pemänioton in lised	–	–

Hiel Oscar Kausch in lised okik Volapükanas näi profäsorans (profesans) id ämäniotom profäsoralis (profesalis).

Primo (dü yel 1888id) el “dilekan kadäma” äbinon cal balatik. Ettimo el Schleyer i pänemom dilekal kadäma. Klu äkanoyöv distidön i dinitis sököl: dilekal, dilekan (ye ‘Schleyer’ no ämäniotom patiko atosi).

Dinits patik

Nüm	Ma ‘Schleyer’	Ma ‘Sleumer’	Nem mögik votik	Dät geva balid	Küpets
29	lekanan	lekanan	–	1892, 4ul
30	klubapänal	klubapänan	–	1899, 9ul	ma ‘Schleyer’ i klubepänel
31	zälileodan	zälileodükan	–	1890, 9ul	primo: zälileodel
32	musigan	musigal	musigal, noatädan	1889, 8ul
33	spodel	spodan	spodan nen diplom; spodan komunik; spodan	1884, 1ul	ma ‘Schleyer’ primo: spodel, poso: spodel nulik (nen diped), spodel (nen diped)
34	pükal	spikädan	–	1890, 5ul	ma ‘Schleyer’ i pükatel
35	spodal	spodal	spodan pediplomöl	1888, 6ul	primo: spodel
36	poedan	poedan	–	1889, 7ul
37	stimakopanal	stimaliman	–	1888, 6ul
38	lovepolel	tradutan	–	1890, 3ul
39	poedal	poedal	–	1893, 9ul
40	menodel (vobukas)	menodan	menodan (lebukas)	1890, 8ul
41	lartügel	no pemänioton	yegedilautan	1894, 3ul	Artikelverfasser
42	revidel	no pemänioton	revidan	1894, 7ul
43	gudumel	no pemänioton	gudükuman	1897, 7ul

Sikots patik

El Schleyer it älecedom sikotis zuik sököl löpikumis, ka votikis.

Nüm	Ma ‘Schleyer’	Nem mögik votik	Dät geva balid	Küpets
44	volapükakön, poso kön gletik datuvela	Volapükakön gretik datuvala; kön gretik di ‘Schleyer’	1890, 6ul
45	könil datuvela vpa.	kön smalik datuvana Volapüka; kön smalik di ‘Schleyer’	1892, 4ul
46	blötanad	blötanad goldik labü nobains 3	1902, 4ul, 10	sikot patik pro läds

Tituls de ‘Kerckhoffs’

Leklub Fransänik pro propagid Vpa. (Fransänapüko: ‘Association française pour la propagation du Vp.’) as sek duina bligädas fikulik u ma meritabs klülik bevü Volapükans ägevon diplomis okik profäsorana e spodala. Diploms at vemo ävöladons bevü Volapükans, ab no pädasevons fa ‘Schleyer’. Too in literat vönik mäniots äkomädons dö “profäsorans Fransänik Volapüka” e “spodals Fransänik Volapüka”.

Liseds dinitilabanas

Tidel (= Tidan) Volapüka

Lised tidanas Volapüka

Tidal Volapüka

Lised cifas

Dinits nutimik

Pos deadam ela Schleyer dinits mödikün timäda omik no pägebons, ab dinits nulik anik äpubons ma dalebüds cifalas, sevabo: a) stimacifal (pro cifal nämätik plödü dün), ä) guvan (pro püban gaseda calöfik e Volapükan zilik ön tefs mödik), b) stimakadämal (pro kadäman nämätik plödü dün), c) stimakadäman (pro kadäman nolik plödü dün), d) Volapükavan (sot stimadiploma).

Yüms plödik

Liseds dinitilabanas: pad balid, pad telid, pad kilid, pad folid, pad lulid, pad mälid.