Kadäm Bevünetik Volapüka: Difference between revisions

 

Posä ‘Schleyer’ ön mod somik nu inemödükom, täno iläfulükom kadämi, ‘Kerckhoffs’ bü kongred bevünetik di ‘Paris’ äkoedom daväli kadämalas nulik 13 (bo tefü atos slopans fiedik ela Schleyer äpenom, das dilekan kadäma ifulükom kadämi me meugakompenans okik ed igo ivedükon-la kadämi slafiani oka).

 

Alo kod konflita elas ‘Schleyer’ e ‘Kerckhoffs’ äjinon binön dinäd, das telidan ästeifülom ad vedükön kadämi nogani vero nesekidiki de datuval (ma sam kadämas nolavik mödik, limans kelas kanons bejäfön säkädis bai gitods calöfik oka). El Schleyer lepato äprotestom ta sluds sököl kadäma dilekü ‘Kerckhoffs’: 1) revid staböfik pükasita lölik, bevü votikos finid pianik vokätatonatas, däl ad gebön präpodis: “de”, “al” (“ad”) < tefädo pla genitif e datif, cein tonata: “x” ad grup: “ks”; 2) mög kadäma me pluamanum mö teldils kil vögodas övotükon Volapüki nen däl datuvala; 3) daväl limanas nulik kadäma me vögodam kobädik nen däl datuvala. Bü Volapükakongred bevünetik kilid medü “Volapükabled” okik el Schleyer igo älesagom, das dilekan kadäma no ödalom-la valön topi kongreda bevünetik fovik, kongred nonik ödalon-la palecedön bevünetik ä löpikün nen kom cifala, e fino kongred bevünetik fovik ömuton-la jenön latikumo ka büik mö yels kil, sevabo ün 1890. Atos klülo ätaädon lä desins primik ela Schleyer, kel ileadom preparön kadämi Volapükakongredi bevünetik kilid.