Apofis: Difference between revisions

El '''Apofis''', ud el '''Apopis''' (rugrikänapükiko "Άπόφις", ud "Άπώφις", ed rulägüptänapükiko "Apep", "Apepi", "Aapep", ud "Aapef"), äbinom god miteodava rulägüptänika, malat bada, neita, kaota, e daga. Pämagom valemo fa snek gianagretik. Nem rulägüptänapükik omik, "ʕʒpp", cedon "gianagretik" u "snek gianagretik". Äbinom neflen cifik goda ela [[[Rä]]].

Du tumyel telid bü Y.K., konäd de moted ela Apofis pakonon su völs tema ela Esneh. Lärnoy dö etos, das el [[[Neith]]], jigod yagöl, ämotof ele Apofise spukölo in ülvats.

Bal bevü mags kösömiküns binon uts, kelosi kanoy tuvön in '''[[[Buk Deadamas]]]'''. Kat ela Rä, malat jigoda ela [[[Bastet]]], i panemöl ''kati ela Heliopolis'', leviodof e deidof sneki dub neif.

Bai nols dö god at, el Apofis ätatakom delo boti ela Rä, kel äsailon su el '''[[[Nun]]]''' (ülsean) du täv okik da el '''[[[Duat]]]''' (val disglunik), adas äfinidom jafädaprogedi, ab ai pävikodom.

Nemü gejoikön eli Apofis, el Rä päyufom fa gods votiks: el '''[[[Seth]]]''' päcälom fa el Rä nemü jelodön boti godiki dub lesagit. Tö botaflom el '''[[[Isis]]]''' äfrutof nämädis okikis, nemü sädütön omi sienes, dat änelefüdof omi; atos äleadon kate kapadäkötön sneki. Kludo solasülöpikam alik äcedon vikodi ela Rä ta el Apofis. Blud, kel äflumon de vuns omiks, äredükon gödasili.

Ämagom tädi laidiki ta lespadalaid, so Rulägüptänans äseifüloms sofälükön omi dub blasfäms magiviks. ''Buk ela Apofis'', su papürod ela Rhind-Bremer, de timäd ''[[[Reigäna Nulika|Reigän Nulik]]]'', memon blasfämi patiki, nemü yufön Godi Sola tadunön tatakes ela Apofis. Kleräts äbepenoms dunotis progedöfikis de vität e de moükät: spukön al el Apep; miotön eli Apep dub fut nedetik; sumön lesagiti nemü flapön eli Apep; tanön eli Apep; sumön neifi nemü flapön eli Apep; filükön eli Apep. E ko komands ets ädabinons lejonods in geidian et nemü mekön, väko u däsinoto, snekis gianagretikis, kels püfiloms u püsumätükoms, u su kels üspukoy, du ükomoreidoy blasfämis. Rulägüptänans ädredoms, das igo magod ela Apofis kanonöv givön nämädi diabile. Bi el Apofis älödom in val disglunik, pävätälom ömna, äs "lanifidöl".