Anaïs Nin
Moted: Ángela Anaïs Juana Antolina Rosa Edelmira Nin Culmell
21 febul 1903
Neuilly-sur-Seine
Deadam: 14 yanul 1977
Los Angeles
Deadamakod: kanser
Cal(s): jilautan[*], italifajenädan[*], delabukan[*], librätan[*], jilautan lekonedas[*], jidanüdan[*]
Tatät(s): Kubeän, Lamerikän, Fransän
Matan(s): Hugh Parker Guiler[*], Rupert Pole[*]
Pal(s): Joaquín Nin[*], Rosa Culmell Vaurigaud[*]
Gem(s): Joaquín Nin-Culmell[*], Thorvald Nin Culmell[*]
Dispenäd:

Jiel Anaïs Nin ([ana'iːs nin]; nem lölik ofa äbinon Angela Anais Juana Antolina Rosa Edelmira Nin y Culmell; 1903 febul 21 - 1977 yanul 14) äbinof lautan in Fransän pämotöl, labü blud Katalonänik, Kubeänik ä Danänik, kel äfamikof kodü delabuks ofik, kels bepenons yelis plu mäldegis (de tim, kü älabof bäldoti yelas degbal, ti jü deadam ofik), ed i kodü lautots lerotik oka.

Dü yels mödik, el Anaïs Nin äkipof lifi telik as telmatan. Himatan balid ofik äbinom hiel Hugh Guiler, bankan ä lekanan, ko kel ämatikof ven äbinof yunik ün yels 1920. Hiel Rupert Poole, ko kel ämatikof du äbinof nog jimatan ela Guiler, äbinom fotijelan e pos-posson hiela Frank Lloyd Wright. Himatans bofik jiniko no änoloms lifi telik ela Nin, ed äkolkömoms odi te pos deadam ofik ün 1977. Pos deadama hiela Hugh Guiler ün 1985, fomam lölöfik nen sänsur delabukas ofik päpreparon fa el Rupert Poole.

Lifajenäd redakön

 
Anaïs Nin, c. 1920

El Anaïs Nin pämotof in Neuilly-sur-Seine, in Fransän, as daut noatädana Katalänik: Joaquin Nin e jiela Rosa Culmell y Vigaraud: Danänan labü blud Fransänik e Kubeänik. Ven el Nin älabof bäldoti lifayelas 11, fat ofik älüvom famüli oka. Mot, el Anaïs e blods tel ofik: Thorvald Nin e Joaquin Nin-Culmell, äfealotädons lü New York. Nog ün püberüp okik, el Anaïs äklemof juli ed äprimof ad vobön as „model“ e danüdan.

1923 mäzul 3 ämatikof ko hiel Hugh Parker Guiler (1898-1985). Ün yel äsököl matans äfealotädons ini Paris, kö el Guiler äfövom karieri okik as bankan ed el Nin äprimof ad jäfön me literat. Pübot balid ofik äbinon täxet krütik hiele D. H. Lawrence tiädü D. H. Lawrence: An Unprofessional Study (Hiel D. H. Lawrence: Stud no Calik). Änitedälof i dö lanisanükam, keli ästudof yufü hiel Otto Rank, tidäb hiela Sigmund Freud; dü tim anik pädiletof fa hiel Carl Gustav Jung. Ün 1939, els Nin e Guiler ägefealotädons ini zif New York.

El Anais Nin äkompenof pö biomagodems: Inauguration of the Pleasure Dome (Maifükam Blesiraglöpota, 1954) hiela Kenneth Anger roulü jigod Astarte, Ritual in Transfigured Time (Kultam ün Tim Pevotafomöl, 1946) jiela Maya Deren, e Bells of Atlantis (Kloks Latlantäna, 1952) hiela Ian Hugo (jenöfo himatan ofik: Guiler).

Du äbinof jimatan ela Guiler, ämatikof dönu ko hiel Rupert Pole in Quartzsite, in tat: Arizona tü 1955 mäzul 17, pos kelos el Pole ed of ägevegons ini California. El Guiler äblebom in New York e no änolol matikami telid ela Nin jü deadam ofik ün 1977.

Suvo ämäniotof lautanis Djuna Barnes e D. H. Lawrence as nügivans.

Delabuks redakön

El Anaïs Nin efamikof cifadilo as delabukan. Delabuks ofik, kels bepenons degyelis ömik, binons jänäliks sekü kods mödik. El nin äsevof, suvo mu nätimiko, ko lautans, lekanans e lanivestigans famiks mödiks, bevü pösods sevädik votik. In delabuks okik äbespikof pösodis at me dilet dibätik e stedäl nekösömiks. Zuo, änotodölo lecedi vomik tefü grup famanas cifadilo manikas, delabuks ofik egetons veüti as leigamod e tavät zesüdiks.

Lautots lerotik redakön

El Anaïs Nin pastümof fa krütans mödik as balan samas gudikün lautanas lerotik vomik. Äbinof balan vomas balid, kels jenöfo äbeletävofs lauti lerotik, e jibalidan vü voms Yuropik ad lautön lerotikosi. Bü of, lerotikos fa voms pälautöl ti no ädabinon (pläamü jilautans vemo nemödiks soäs jiel Kate Chopin). El Nin, kodü monaneod däsperik, äpenof konedis in buk: Delta of Venus (Deltad Venuda) tökü dolar bal a pad ün yels 1940.

Äcedof pösodöfis in lerotikos okik mimagodis lemuik e neai ädesinof ad pübön oni. Koneds ofik äbepenons patis tumödik kösada genik, adas päpübons ün tim et. As sam, in fomam nen sänsur delabukas okik, äpenof dö kösad genik ko fat lönik oka.

El Nin äbinon flen, ed ömna jilelöfäb, literatanas famik mödik, keninükamü hiels Henry Miller, Antonin Artaud, Edmund WIlson, Gore Vidal, James Agee, e Lawrence Durrell. Lelöf e flenam lefäkik ofa ko el Miller äflunon vemiko ofi ed as vom ed as lautan. Ma sagäds nenfonik, stabü (bevü votiks) biomagodem hiela Philip Kaufman, Henry & June, el Nin äbinof-la telgenik; atos ye no veraton bai delabuks ofik, in kels äbepenof drimi genik tefü June, ab plä drim at nos äjenon ko voms tel at. Nog bai delabuks, el Nin poso äsperimäntof balna jilelöfäbi, ab seks no äkotenüköns ofi.

Ün 1973 ägetof stimadoki ela Philadelphia College of Art (Löpajul Lekana di Philadelphia). Ün 1974 pävälof ad el National Institute of Arts and Letters (Stitod Netik Lekanas e Literata).

Tü 1977 yanul 14id el Anaïs Nin ädeadof in Los Angeles sekü kanser. Koap ofik päfilon; zens ofik päjedülons love Bug di Santa Monica in California.

Dö el Anaïs Nin redakön

  • Ün 1990, hiel Philip Kaufman ämekom biomagodemi: Henry & June stabü lekoned ofik: Henry &June (Hiel Henry e jiel June) se The Journal of Love - The Unexpurgated Diary of Anaïs Nin, 1931-1932 (Delabuk Lelöfa: Delabuks no päsänsuröl jiela Anaïs Nin, 1931-1932). Jiel Maria de Medeiros älabof rouli ela Nin, hiel Fred Ward uti ela Henry Miller, e jiel Uma Thurman uti ela June Miller. Biomagodem at äfamikon as balid, kel ägetof mali: NC-17 (peproiböl menes bäldotü läs 17) de el Motion Picture Association of America (Klub Biomagodemas Lamerikäna).
  • Ün 2005, hiels François Bernheim e Christian Bouclier äpenoms ed änoatädoms kaniti Anaïs Nin (in Fransänapük), kel päkaniton fa telat: Romane Serda e Renaud.

Lautots redakön

  • D.H. Lawrence: An Unprofessional Study
  • Collages
  • Winter of Artifice
  • Under a Glass Bell
  • House of Incest
  • Delta of Venus
  • Little Birds
  • Cities of the Interior, labü toums lul:
    • Ladders to Fire
    • Children of the Albatross
    • The Four-Chambered Heart
    • A Spy in the House of Love
    • Seduction of the Minotaur
  • The Diary of Anaïs Nin 7 volumes
  • The Early Diary of Anaïs Nin 4 volumes
  • The Novel of the Future
  • Henry and June
  • Incest
  • Fire
  • Nearer the Moon

Literat redakön

  • Bair, Deirdre. 1995. Anaïs Nin: a biography. New York: Putnam. ISBN 0-399-13988-5 (in Deutänapük päpüböl ün 1998 tiädü: Anaïs Nin. Eine Biographie, München: Goldmann).
  • Barillé, Elisabeth. 1992. Maskierte Venus. Das Leben der Anaïs Nin. München: Knaus. ISBN 3-8135-0078-0
  • Fitch, Noël Riley. 1993. The erotic life of Anaïs Nin. New York: Little, Brown. ISBN 0-316-28428-9
  • Gronau, Dietrich. 1993. Anaïs Nin. Erotik und Poesie. Heyne-Bücher, nüm: 12, ä Heyne-Biographien, nüm: 235. München: Heyne. ISBN 3-453-06346-5
  • Jason, Philip K. Anais Nin. 1995. Dictionary of Literary Biography (dabükot yela 1995), toum 4id, pads: 299-303.
  • Salber, Linde. 1992. Anaïs Nin. Mit Selbstzeugnissen und Bilddokumenten. Rowohlts Monographien: 482. Reinbek nilü Hamburg: Rowohlt.

Yüms plödik redakön

In Linglänapük: